Tara-Bandu iha Distritu Ermera: Komemorasaun Tinan Ida

Tara-bandu hanesan pratika sosial ida nebe beiala sira rai hela ba Timoroan sira no ida ne’e hanesan meius ida nebe uja hodi kria dame no hakmatek iha sosiedade nia laran. Iha Timor laran tomak, ita bele hare pratika ida ne’e iha grupu etnolinguistika tomak. Iha tempu okupsaun kolonial Portugues, tara-bandu moris ho buras iha sosiedade nia let. Maibe durante okupasaun Indonesia iha tinan 24, tara-bandu hetan opresaun makaas. Ida ne’e akontese tamba Estadu Indonesia hare katak tara-bandu asosiadu ho pratika animismu nebe nagtivu.

Iha tempu ukun-an, Timoroan sira komesa fali ona buka tuir pratika tara-bandu tamba bele fo vantajem nebe diak ba sira iha prosesu hari’I nasaun-estadu. Wainhira lei no regulamentu modernu husi rai liur ladun lao diak tamba desafiu oioin, komunidade sira bele uja tara-bandu nudar meius ida hodi kria orden sosial iha sira nia let.

Hanesan isplika iha kraik tara-bandu hanesan pratika ida nebe bele uja fleksibelmente atu regula relasaun entre ema ho ema, ema no animal, ema ho natureza.

Iha data 03-04 fulan Marsu 2013, komunidade husi distritu Ermera halo selebrasaun tinan ida implementasaun akta no regulamentu “tara-bandu”. Selebrasaun ida ne’e konsentra iha Atsabe no Letefoho. Atividade tara-bandu ne’e, hahu ho enkontru sosializasaun no diskusaun kona-ba impaktu ba mudansa situasaun iha distritu Ermera.

Iha selebrasaun tinan ida tara-bandu (Abril 2012-Marsu 2013) ne’e, foti tema sentral mak “Hametin Ekonomia, Sosial, Paz, Harmonia Sosial no Haburas Ambiente”. Partisipa iha programa ne’e membru Guvernu nivel nasional no lokal, Reprezentante husi Uma-fukun Parlamentu Nasional, reprezentante Dirasaun Nasional Polisia Komunitaria, Padre, no reprezentante hosi Palasio Presidensia nian. Representante loka sira husi distritu Ermera rasik mak hanesan autoridade lokal, Administrador Distritu no sub-distritu nain-lima,  Xefe Suco hosi Suco 52, lia-nain no populasaun hosi Atsabe no Letefoho besik rihun ida.

Iha tinan kotuk liu ba,  27 fulan Abril tinan 2012, Iha Hatmau-Tei, Ermera, parte kompetente sira hanesan, autoridade lokal, autoridade komunitariu ho lia-nain sira distritu Ermera lansa asina akta no regulamentu tara-bandu nebe Presidente anterior H.E Jose Ramos Horta no Dom Alberto Ricardo da Silva mos marka nia presensa.

Iha relatoriu progresu implementasaun tara-bandu ne’e, Sr. Victor Soares, Administrador Distritu Ermera nudar responsabel mazimu ba tara-bandu ne’e konfirma katak depois hahu lansa tara-bandu iha Abril 2012, lori mudansa ida posetivu no bo’ot tebtebes ba komunidade tomak iha distritu Ermera. Rezultadu posetivu balun ne’ebe bele hare’e direitamente mak laiha violensia ne’ebe prejudika populasaun moris iha situasaun sofre no emerjensia (hamlaha, uma laiha, nsst), numeru krime iha polisia redus, numeru joven-feto mane ne’ebe eskola aumenta inklui autoridade lokal la simu proposta ka preukupasaun kona-ba populasaun hamlah tamba rai sai matak no bokur hodi fo isin diak ba toos batar, toos modo, kafe, natar no selseluk-tan. Maske problema sei akontese nafatin maibe frekwensia ne’e menus kompara ho situasaun antes lansa tara-bandu ne’e, hatete Administrador distritu Ermera.

Jose Nominandu Buras, S.E. Meiu Ambiente ne’ebe reprezenta Guvernu iha ninia intervensaun hatete katak “tara-bandu’ laos sasan importasaun ida no laos buat foun ida ba ita. Maibe tara-bandu nudar lisan no kustume Timor-oan sira nian ne’ebe mai husi ita nia bei-ala sira. Tara-bandu ne’e atu regula ita iha dimensaun sosiu-kultural no dimensaun natureza-ambiental-ninian. Tamba ne’e implementasaun tara-bandu nudar inisiativa lokal ne’e importante no Guvernu sei fo apoiu maximu atu tara-bandu ne’e lori benefisiu diak ba komunidade iha Ermera agora no ba futuru oin-mai. Husi dimensaun sosio-kultutal nian konaba oinsa ema bele respeitu malu, valoriza ita nia tradisaun ne’ebe sai abut ba harii paz, dame no hakmatek. Iha dimensaun natureza-ambiental ninian, ida ne’e ligasaun oinsa mak ita bele hetan ka simu aihan diak, bee-diak hosi ita nia natureza no ambiente rasik.

Iha lansamentu akta no tara-bandu iha tinan 2012 liu-ba, regula dimensaun tolu importante iha akta refere. Ida mak regula kona-ba relasaun ema ho natureza, segundu mak kona-ba relasaun ema ho animal no kona-ba relasaun ema ho ema.

Iha dimensaun ema ho natureza-ninian, akta kona-ba tara-bandu ida ne’e regula pontu-sira mak hanesan bandu atu labele:

a)      sunu rai ne’ebe laos toos no ai-matak ne’ebe moris;

b)      Kuu ai-fuan ne’ebe seidauk to’o nia tempu atu kuu (kafe, kulu, haas, hudi, ai-nanas, nsst; tesi ai-matak/ai industria ninian la ho lisensa ho estraga ema seluk nia ai-horis;

c)      destroi onuk ka Bee-inan, estraga kanu torneira no tenki abastesimentu Bee;

d)      estraga sasan publiku mak hanesan sede suku, klinika, postu siska, MCK, eskola no kapela;

e)      tama ema seluk nia toos no kintal;

f)       foti fatuk no raut rai-henek iha fatin ne’ebe risku ba dezastre.

Iha parte relasaun entre ema ho animanl-ninian, regula konaba bandu atu labele:

a)      husik abandona animal hakiak iha luron ka fatin publiku;

b)      husik animal ba tama estraga ema seluk nia toos, kintal;

c)      kassa/oho animal fuik iha rai-maran ka bee-laran ne’ebe hetan protesaun husi komunidade mak hanesan lafaek, foho-rai, lekiraik, pombu, loriku, kakatua, tuna, nsst;

d)      hadau-malu (naok-animal ba malu, karau, kuda, bibi, asu, manu, busa, nsst.

Ikus relasaun entre ema ba ema, regula kona-ba bandu atu labele:

a)      hal seksual ho minoridade (5-15th);

b)      halo seksual entre laen-kaben ho feto klosan no feto klosan ho mane-kaben-nain;

c)      halo seksual entre familia ne’ebe sei iha relsaun primeira-grau, segundu-grau no terseira-grau;

d)      hadau-malu rai/baliza;

e)      loke jogu, bola-guling, kuru-kuru, SDSB;

f)       halo violensia domestika (baku-malu feen-laen);

g)      baku-malu entre joven;

h)      husu barlake bazeia ba konkordansia parte-rua;

i)        halo istilu kore-metan;

j)        oho animal liu kbiit ba mate-foun;

k)      halo violensia fiziku (rezolve problema ho violensia);

l)        pratika trafiku (faan ema ba ema seluk, nsst).

Molok atu remata programa selebra tinan ida tara-bandu no re-tarabandu ne’e, lia-nain sira husi Atsabe hala’o seremonia ritual hodi halo-manas fila-fali bandu sira ne’ebe tau no implementa-tiha ona desde tinan 2012 liu-ba ne’e.

Aktividade tara-bandu hanesan iha distritu Ermera hanesan fanu ida ba ita Timoroan tomak hodi hare hikas fali ita nia pratika kultural sira nebe bele fo benefisiu ba ita nia moris iha prosesu hari’i nasaun-estadu. Distritu seluk mos bele banate tuir ejemplu diak nebe halo ona iha distritu Ermera.

Hakerek na’in servisu nudar Assessor Sosiedade Sivil iha Palasio Presidensial, Aitarak Laran.